១៨
ពាក្យ​អរ​ព្រះគុណ​របស់​ស្ដេច​ដាវីឌ​នៅ​ពេល​មាន​ជ័យជំនះ
ទំនុក​ពី​សៀវភៅ​របស់​គ្រូ​ចំរៀង ទំនុក​របស់​ស្ដេច​ដាវីឌ​ជា​អ្នក​បំរើ​របស់​ព្រះអម្ចាស់ ជា​ពាក្យ​ដែល​ស្ដេច​ច្រៀង​ថ្វាយ​ព្រះអម្ចាស់ នៅ​ថ្ងៃ​ដែល​ព្រះអង្គ​បាន​រំដោះ​ស្ដេច អោយ​រួច​ពី​កណ្ដាប់​ដៃ​របស់​ខ្មាំង​សត្រូវ​ទាំង​ប៉ុន្មាន និង​រួច​ពី​កណ្ដាប់​ដៃ​របស់​ស្ដេច​សូល។
១ ទ្រង់​មាន​រាជឱង្ការ​ថា៖
ឱ​ព្រះអម្ចាស់​អើយ
ទូលបង្គំ​ស្រឡាញ់​ព្រះអង្គ
ព្រោះ​ព្រះអង្គ​ជា​កម្លាំង​របស់​ទូលបង្គំ!
២ ព្រះអម្ចាស់​ជា​ថ្មដា​ការពារ​ទូលបង្គំ
ជា​បន្ទាយ​ដ៏​រឹងមាំ​របស់​ទូលបង្គំ
ជា​ព្រះ​ដែល​ជួយ​រំដោះ​ទូលបង្គំ
ព្រះអង្គ​ជា​ព្រះ​នៃ​ទូលបង្គំ
ជា​ថ្មដា​សំរាប់​ទូលបង្គំ​ពឹង​ជ្រក ព្រះអង្គ​ជា​ខែល
ជា​កម្លាំង​ដែល​សង្គ្រោះ​ទូលបង្គំ
និង​ជា​ជំរក​ដ៏​មាំមួន​របស់​ទូលបង្គំ។
៣ ពេល​ខ្ញុំ​ស្រែក​រក​ព្រះអង្គ
ព្រះអង្គ​សង្គ្រោះ​ខ្ញុំ​អោយ​រួច​ពី​ខ្មាំង​សត្រូវ​របស់​ខ្ញុំ
សូម​លើក​តម្កើង​ព្រះអម្ចាស់!។
៤ សេចក្ដី​ស្លាប់​រួប​រឹត​ខ្ញុំ
រីឯ​សេចក្ដី​វិនាស​អន្តរាយ
ធ្លាក់​មក​លើ​ខ្ញុំ ដូច​ទឹក​ហូរ​មក​យ៉ាង​ខ្លាំង។
៥ សេចក្ដី​ស្លាប់​នៅ​ព័ទ្ធ​ជុំវិញ​ខ្ញុំ
ដូច​ជា​សំណាញ់​ដែល​គេ​បោះ​មក​លើ​ខ្ញុំ។
៦ នៅ​ពេល​មាន​ទុក្ខ​វេទនា ខ្ញុំ​អង្វរ​រក​ព្រះអម្ចាស់
ខ្ញុំ​ស្រែក​ហៅ​រក​ព្រះ​របស់​ខ្ញុំ
ពី​ក្នុង​ព្រះវិហារ​របស់​ព្រះអង្គ
ទ្រង់​ព្រះសណ្ដាប់​ឮ​សំឡេង​ខ្ញុំ
ហើយ​ស្នូរ​សំរែក​របស់​ខ្ញុំ​បាន​ឮ​ទៅ​ដល់
ព្រះកាណ៌​របស់​ព្រះអង្គ។
៧ ពេល​នោះ ផែនដី​ក៏​កក្រើក​ញាប់ញ័រ
ភ្នំ​ទាំងឡាយ​ត្រូវ​រង្គើ​រហូត​ដល់​គ្រឹះ​របស់​វា
ហើយ​កក្រើក
ដោយសារ​ព្រះអង្គ​ទ្រង់​ព្រះពិរោធ។
៨ មាន​ផ្សែង​ហុយ​ចេញ​មក​ពី​ព្រះនាសា​របស់​ព្រះអង្គ
ព្រះអង្គ​ផ្លុំ​ភ្លើង​ដែល​ឆាបឆេះ​ចេញ​មក
ហើយ​ក៏​មាន​រងើក​ភ្លើង​ខ្ទាត​ចេញ​មក
ពី​ព្រះឱស្ឋ​របស់​ព្រះអង្គ​ដែរ។
៩ ព្រះអង្គ​បាន​ផ្អៀង​ផ្ទៃ​មេឃ ទ្រង់​យាង​ចុះ​មក
ដោយ​មាន​ពពក​យ៉ាង​ក្រាស់
នៅ​ពី​ក្រោម​ព្រះបាទា​ផង។
១០ ព្រះអង្គ​យាង​គង់​លើ​ចេរូប៊ីន* ហើយ​ហោះ​មក
ព្រះអង្គ​គង់​នៅ​លើ​វាយោ
ដូច​គង់​នៅ​លើ​ស្លាប​បក្សី។
១១ ព្រះអង្គ​យក​ភាព​ងងឹត​ធ្វើ​ជា​កន្លែង​ពួន
ហើយ​យក​ពពក​ខ្មៅ​ក្រាស់​ពេញ​ទៅ​ដោយ​ទឹក
ធ្វើ​ជា​ព្រះពន្លា។
១២ មាន​ផ្លេក​បន្ទោរ​ចេញ​មក​ពី​ពពក
ភ្លឺ​នៅ​ខាង​មុខ​ព្រះអង្គ
ហើយ​មាន​ព្រឹល និង​រងើក​ភ្លើង​ធ្លាក់​ចុះ​មក។
១៣ ព្រះអម្ចាស់ធ្វើ​អោយ​មាន​ស្នូរ​ផ្គរលាន់​នៅ​លើ​មេឃ
ព្រះ​ដ៏​ខ្ពង់ខ្ពស់​បំផុត​បន្លឺ​ព្រះសូរសៀង​។
១៤ ព្រះអង្គ​បាញ់​ព្រួញ​របស់​ព្រះអង្គ​ទៅ​លើ​ខ្មាំង​សត្រូវ
ដើម្បី​កំចាត់កំចាយ​ពួក​គេ។
ព្រះអង្គ​បាញ់​ផ្លេក​បន្ទោរ
ធ្វើ​អោយ​ពួក​គេ​បាក់​ទ័ព។
១៥ ឱ​ព្រះអម្ចាស់​អើយ
ព្រះបន្ទូល​គំរាម​របស់​ព្រះអង្គ និង​ខ្យល់​ព្យុះ
ដែល​បក់​ចេញ​មក​ពី​ព្រះនាសា​របស់​ព្រះអង្គ
បាន​ធ្វើ​អោយ​បាត​សមុទ្រ​លេច​ចេញ​មក
ហើយ​គ្រឹះ​របស់​ផែនដី​ក៏​លេច​មក​ដែរ។
១៦ ព្រះអង្គ​បាន​លាត​ព្រះហស្ដ​ពី​ស្ថាន​លើ​មក​រក​ខ្ញុំ
ព្រះអង្គ​ស្រង់​ខ្ញុំ​ចេញ​អោយ​ផុត​ពី​ទឹក​សមុទ្រ
១៧ ព្រះអង្គ​បាន​រំដោះ​ខ្ញុំ​អោយ​រួច​ផុត​ពី
ខ្មាំង​សត្រូវ​ដ៏​ខ្លាំង​ពូកែ
ហើយ​អោយ​ខ្ញុំ​រួច​ផុត​ពី​អស់​អ្នក​ដែល​ស្អប់​ខ្ញុំ
ព្រម​ទាំង​អស់​អ្នក​ដែល​មាន​កម្លាំង
ខ្លាំង​ជាង​ខ្ញុំ​ផង។
១៨ នៅ​ពេល​ខ្ញុំ​មាន​ទុក្ខ​វេទនា
អ្នក​ទាំង​នោះ​នាំ​គ្នា​មក​វាយ​ប្រហារ​ខ្ញុំ
ក៏​ប៉ុន្តែ ព្រះអម្ចាស់​ធ្វើ​ជា​បង្អែក​របស់​ខ្ញុំ។
១៩ ព្រះអង្គ​បាន​នាំ​ខ្ញុំ​ចេញ​អោយ​ផុត​ពី​គ្រោះ​ថ្នាក់
ព្រះអង្គ​រំដោះ​ខ្ញុំ មក​ពី​ព្រះអង្គ​ស្រឡាញ់​ខ្ញុំ។
២០ ព្រះអម្ចាស់​បាន​ប្រព្រឹត្ត​ចំពោះ​ខ្ញុំ
ស្រប​តាម​សេចក្ដី​សុចរិត​របស់​ខ្ញុំ
ព្រះអង្គ​តប​ស្នង​មក​ខ្ញុំ​វិញ
ស្រប​តាម​អំពើ​បរិសុទ្ធ​ដែល​ខ្ញុំ​បាន​ប្រព្រឹត្ត​ដែរ
២១ ដ្បិត​ខ្ញុំ​បាន​ប្រតិបត្តិ​តាម​មាគ៌ា​របស់​ព្រះអម្ចាស់
ហើយ​ខ្ញុំ​មិន​បាន​ឃ្លាត​ចេញ​ពី​ព្រះ​របស់​ខ្ញុំ
ដោយ​ប្រព្រឹត្ត​អំពើ​អាក្រក់​នោះ​ឡើយ។
២២ ខ្ញុំ​បាន​ប្រព្រឹត្ត​តាម​វិន័យ​ទាំង​ប៉ុន្មាន
របស់​ព្រះអង្គ ខ្ញុំ​មិន​បាន​បំពាន​លើ​បញ្ញត្តិ
របស់​ព្រះអង្គ​ទេ។
២៣ ព្រះអង្គ​ជ្រាប​ថា​ខ្ញុំ​គ្មាន​សៅហ្មង
ហើយ​ខ្ញុំ​បាន​ប្រយ័ត្ន​ខ្លួន
មិន​អោយ​មាន​កំហុស​ឡើយ។
២៤ ព្រះអម្ចាស់​ប្រោសប្រណី​ដល់​ខ្ញុំ
ស្រប​តាម​អំពើ​សុចរិត​ដែល​ខ្ញុំ​បាន​ប្រព្រឹត្ត
ព្រោះ​ព្រះអង្គ​ឈ្វេង​យល់​ថា​ខ្ញុំ​ប្រព្រឹត្ត
អំពើ​បរិសុទ្ធ។
២៥ ព្រះអម្ចាស់​អើយ
ព្រះអង្គ​សំដែង​ព្រះហឫទ័យ​ស្មោះ​ត្រង់​ចំពោះ​អ្នក
ដែល​មាន​ចិត្ត​ស្មោះ​ត្រង់
ព្រះអង្គ​សំដែង​ព្រះហឫទ័យ​ស្មោះសរ
ចំពោះ​អ្នក​ដែល​មាន​ចិត្ត​ស្មោះសរ។
២៦ ចំពោះ​អ្នក​ដែល​មាន​ចិត្ត​បរិសុទ្ធ
ព្រះអង្គ​ក៏​សំដែង​ថា ព្រះអង្គ​បរិសុទ្ធ​ដែរ
ចំពោះ​អ្នក​ដែល​មាន​ចិត្ត​វៀចវេរ​វិញ
ព្រះអង្គ​សំដែង​ថា​ព្រះអង្គ​ឈ្លាសវៃ
២៧ ដ្បិត​ព្រះអង្គ​ហើយ ដែល​សង្គ្រោះ​មនុស្ស​ទន់ទាប
និង​បន្ទាប​អស់​អ្នក​ដែល​មាន​ចិត្ត​ឆ្មើងឆ្មៃ។
២៨ ឱ​ព្រះអម្ចាស់​ជា​ព្រះ​នៃ​ទូលបង្គំ​អើយ
ព្រះអង្គ​ជា​ពន្លឺ​របស់​ទូលបង្គំ
ហើយ​ព្រះអង្គ​ក៏​បំភ្លឺ​សេចក្ដី​ងងឹត
របស់​ទូលបង្គំ​ដែរ។
២៩ ព្រះអង្គ​ប្រទាន​កម្លាំង​អោយ​ទូលបង្គំ
វាយ​លុក​ខ្មាំង​សត្រូវ
និង​អោយ​ទូលបង្គំ​អាច​លោត​រំលង​កំពែង
ក្រុង​របស់​ពួក​គេ។
៣០ មាគ៌ា​របស់​ព្រះជាម្ចាស់​សុទ្ធ​តែ​ល្អ​ឥត​ខ្ចោះ
ព្រះបន្ទូល​សន្យា​របស់​ព្រះអម្ចាស់​ពិត​ទាំង​ស្រុង
ព្រះអង្គ​ជា​ខែល​ការពារ​អស់​អ្នក
ដែល​មក​ជ្រក​កោន​ជា​មួយ​ព្រះអង្គ។
៣១ មាន​តែ​ព្រះអម្ចាស់​មួយ​គត់
ដែល​ពិត​ជា​ព្រះជាម្ចាស់
មាន​តែ​ព្រះ​របស់​យើង​មួយ​ព្រះអង្គ​ប៉ុណ្ណោះ
ដែល​ពិត​ជា​ថ្មដា​សំរាប់​អោយ​យើង​ជ្រក​កោន។
៣២ ព្រះជាម្ចាស់​ប្រទាន​អោយ​ខ្ញុំ​មាន​កម្លាំង
និង​ប្រទាន​អោយ​មាគ៌ា​របស់​ខ្ញុំ​បាន​ល្អ​ឥត​ខ្ចោះ។
៣៣ ព្រះអង្គ​ប្រោស​ប្រទាន​អោយ​ខ្ញុំ
រត់​លឿន​ដូច​សត្វ​ក្ដាន់
ហើយ​អោយ​ខ្ញុំ​អាច​ឈរ​នៅ​ទី​ខ្ពស់។
៣៤ ព្រះអង្គ​បង្ហាត់​ខ្ញុំ​អោយ​ស្ទាត់​ជំនាញ​ខាង​ធ្វើ​សឹក
និង​អោយ​ខ្ញុំ​មាន​កម្លាំង​យឹត​ធ្នូ​លង្ហិន​បាន។
៣៥ ឱ​ព្រះអម្ចាស់​អើយ
ព្រះអង្គ​ការពារ និង​សង្គ្រោះ​ទូលបង្គំ
ព្រះអង្គ​គាំទ្រ​ទូលបង្គំ ដោយ​ឫទ្ធិបារមី​របស់​ព្រះអង្គ
ហើយ​ព្រះអង្គ​លើក​ទូលបង្គំ​ឡើង
ដោយ​ព្រះហឫទ័យ​មេត្តា។
៣៦ ព្រះអង្គ​ការពារ​ទូលបង្គំ
មិន​អោយ​ខ្មាំង​សត្រូវ​ដេញ​ទាន់
មិន​អោយ​ទូលបង្គំ​ភ្លាត់​ជើង​ដួល​ឡើយ។
៣៧ ទូលបង្គំ​ដេញ​តាម​ពួក​ខ្មាំង​សត្រូវ
និង​ចាប់​ពួក​គេ​បាន
ហើយ​ទូលបង្គំ​មិន​ត្រឡប់​មក​វិញ​ទេ
ដរាប​ទាល់​តែ​បាន​កំទេច​ពួក​គេ​អស់។
៣៨ ទូលបង្គំ​កាប់​សម្លាប់​ពួក​គេ
មិន​អោយ​ពួក​គេ​ក្រោក​ឡើង​វិញ​បាន​ឡើយ
ពួក​គេ​ដួល​ស្លាប់​នៅ​នឹង​ជើង​របស់​ទូលបង្គំ។
៣៩ ព្រះអង្គ​ប្រទាន​អោយ​ទូលបង្គំ​មាន​កម្លាំង
នឹង​ធ្វើ​សឹក និង​មាន​ជ័យជំនះ​លើ​ខ្មាំង​សត្រូវ។
៤០ ព្រះអង្គ​បាន​ធ្វើ​អោយ​ពួក​គេ​បាក់​ទ័ព
រត់​នៅ​មុខ​ទូលបង្គំ
ហើយ​ទូលបង្គំ​បាន​ធ្វើ​អោយ​អស់​អ្នក
ដែល​ស្អប់​ទូលបង្គំ​វិនាស​សូន្យ​អស់​ទៅ។
៤១ គេ​នាំ​គ្នា​ស្រែក​រក​ជំនួយ
តែ​គ្មាន​នរណា​ជួយ​ពួក​គេ​សោះ
គេ​ស្រែក​ហៅ​ព្រះអម្ចាស់
តែ​ព្រះអង្គ​មិន​ឆ្លើយ​តប​នឹង​ពួក​គេ​ឡើយ។
៤២ ទូលបង្គំ​បាន​កំទេច​ពួក​គេ​អោយ​ហ្មត់
ដូច​ធូលី​ដី​ដែល​ត្រូវ​ខ្យល់​ផាត់
ទូលបង្គំ​បាន​បោស​ពួក​គេ
ដូច​ភក់​ជ្រាំ​នៅ​តាម​ផ្លូវ។
៤៣ ព្រះអង្គ​បាន​រំដោះ​ទូលបង្គំ​អោយ​រួច
ពី​ការ​បះបោរ​របស់​ប្រជាជន
ហើយ​តែងតាំង​ទូលបង្គំ
អោយ​ធ្វើ​ជា​អ្នក​ដឹក​នាំ​ប្រជាជាតិ​នានា
ប្រជាជន​មួយ​ដែល​ទូលបង្គំ​មិន​ស្គាល់
បាន​មក​ចុះ​ចូល​នឹង​ទូលបង្គំ។
៤៤ ជន​បរទេស​នាំ​គ្នា​ស្ដាប់​បង្គាប់​ទូលបង្គំ
ហើយ​ពេល​ទូលបង្គំ​និយាយ​តែ​មួយ​ម៉ាត់
គេ​ក៏​ធ្វើ​តាម​ភ្លាម។
៤៥ ជន​បរទេស​បាក់​ទឹក​ចិត្ត
ហើយ​ចេញ​ពី​ទី​ជំរក​របស់​គេ​មក
ទាំង​ភ័យ​ញាប់ញ័រ។
៤៦ ជយោ​ព្រះអម្ចាស់! សូម​សរសើរ​តម្កើង​ព្រះអង្គ
ដែល​ជា​ថ្មដា​របស់​ទូលបង្គំ!
សូម​លើក​តម្កើង​ព្រះជាម្ចាស់
ដែល​បាន​សង្គ្រោះ​ទូលបង្គំ!
៤៧ ដ្បិត​ព្រះអង្គ​បាន​អោយ​ទូលបង្គំ
មាន​ជ័យជំនះ​លើ​ខ្មាំង​សត្រូវ
ព្រះអង្គ​បាន​បង្ក្រាប​ប្រជាជន​នានា
អោយ​មក​ចុះ​ចូល​នឹង​ទូលបង្គំ
៤៨ ហើយ​ព្រះអង្គ​បាន​ប្រោស​ទូលបង្គំ
អោយ​រួច​ផុត​ពី​កណ្ដាប់​ដៃ​របស់​ខ្មាំង​សត្រូវ!។
ព្រះអង្គ​បាន​លើក​ទូលបង្គំ​ឡើង​ខ្ពស់
ជាង​បច្ចាមិត្ត​របស់​ទូលបង្គំ
និង​រំដោះ​ទូលបង្គំ​អោយ​រួច​ផុត​ពី
មនុស្ស​ឃោរឃៅ។
៤៩ ហេតុ​នេះ​ហើយ​បាន​ជា​ទូលបង្គំ​សរសើរ
តម្កើង​ព្រះអង្គ​ក្នុង​ចំណោម​ប្រជាជាតិ​នានា
ឱ​ព្រះអម្ចាស់​អើយ!
ទូលបង្គំ​នឹង​ច្រៀង​លើក​តម្កើង​ព្រះនាម
របស់​ព្រះអង្គ។
៥០ ព្រះអង្គ​បាន​ធ្វើ​ការ​អស្ចារ្យ
ដើម្បី​សង្គ្រោះ​ស្ដេច​ដែល​ព្រះអង្គ​បាន​តែងតាំង
ព្រះអង្គ​បាន​សំដែង​ព្រះហឫទ័យ​ស្មោះត្រង់
ចំពោះ​ស្ដេច​ដែល​ព្រះអង្គ​បាន​ចាក់​ប្រេង​អភិសេក
គឺ​ចំពោះ​ស្ដេច​ដាវីឌ
និង​ពូជពង្ស​រៀង​រហូត​ត​ទៅ។