ព្រះគម្ពីរប្រាប់យើងថា អ្វីៗដែលព្រះជាម្ចាស់បានបង្កើត សុទ្ធតែល្អឥតខ្ចោះ។ ព្រះជាម្ចាស់មានព្រះហឫទ័យស្មោះស្ម័គ្រ ទ្រង់មិនដែលបោះបង់ចោលយើងឡើយ ទោះបីជាញឹកញាប់ យើងបានបោះបង់ និងបំភ្លេចព្រះអង្គចោលក៏ដោយ។ យើងទាំងអស់គ្នាប្រៀបបីដូចជាផ្កាមួយដើមដែលព្រះអង្គដាំនៅក្នុងសួនឧទ្យានរបស់ព្រះអង្គ។ ព្រះអង្គតែងតែថែទាំ តាក់តែងលំអផ្កានេះឲ្យមានសោភ័ណភាពប្លែកៗគ្នា ម្នាក់ៗមានលំអពិសេស ខុសដាច់ពីគេ។
ដោយដឹងថា យើងម្នាក់ៗសុទ្ធតែមានតម្លៃនាំចំពោះព្រះភ័ក្ត្ររបស់ព្រះអង្គ ហើយដឹងថា ព្រះជាម្ចាស់យកព្រះហឫទ័យទុកដាក់នឹងយើង ជីវិតរបស់យើងពិតជាមានន័យ និងមានសង្ឃឹមជានិច្ច។ ថ្ងៃថ្មី នាំមកនូវសោភ័ណភាពថ្មីជានិច្ច។ (សុខ ញ៉ឹប អរុណ)